: الرئيسية » موضوعات مختارة » عندك فكرة مشروع انتاجي ومحتاج ممول أو شريك؟ اقرأ هذا العرض

عندك فكرة مشروع انتاجي ومحتاج ممول أو شريك؟ اقرأ هذا العرض

بسم لله الرحمن الرحيم

احنا ثلاثة شباب ، او اكبر من الشباب شويه ، بنشتغل بره مصر من كذا سنة ، تعبنا من الغربةوقررنا نرجع ، عارفين الاحوال في مصر صعبة ، بس الغربة أصعب.

بعضنا في الغربة من 8سنين وبعضنا في الغربة من 11سنة.

الحمد لله ، اشتغلنا وبذلنا جهد، وربنا عوضنا عن الجهد بالحلال.

احنا شفنا واتأكدنا ان المضمون في المشاريع هي المشاريع الانتاجية ،

طبعا مش ضد المشروعات الخدمية أو التجارية ، لكن احنا التلاتة مقتنعين ان المشاريع الانتاجية هي الابقى والاضمن. وده رغم أن شغلنا احنا التلاتة  في مجال ورقي وحسابات ، بس بالتحديد من خلال الحسابات ومع طول المدة ، اقتنعنا ان الصناعة والانتاج مضمونين اكتر.

قررنا احنا التلاتة ندور على صنايعية أو مهندسين أو حرفيين عندهم أفكار لمشاريع انتاجية ومحتاجين تمويل أو شريك عشان يبدئوا. ورشة أو مصنع صغير بيعمل منتج سهل توزيعه وفي احتياج له. أو يكونوا شغالين وعايزين يطوروا أو يجددوا ومحتاجين شريك أو شركاء.

احنا مش مليونيرات ، لكن الحمد لله معانا مبلغ ممكن يكون كافي لبداية مشروع معقول أو 3 مشاريع صغيرة.
باختصار معانا احنا التلاتة حوالي 3مليون جنيه.

دي تحويشة عمرنا ، وشقى الغربة لسنين طويلة. طبعا معنا قرشين تاني اقل شوية ، نرتب بيهم حياتنا في مصر.

 

ايه المطلوب وايه الفكرة؟

  • ببساطة محتاجين افكار لمشاريع سواء مشروع واحد كبير بالمبلغ كله ، او 3مشاريع صغيرة ، نشارك فيها ونساعد ، تاخد وقتها وتكون بتقدم منتج أو سلعة أو حاجة نقدر نسوقها وفي نفس الوقت الخسارة فيها مش كارثة لان العدد والالات والمنتج مش هيضيع ، يعني مش بنفكر في بيع وشراء عقارات أو شقق ، ولا بنفكر في تربية حيوانات وعلف ودواجن.

بصراحة ليس هذا ما نبحث عنه ، نحن نبحث عن مشروع يقدم زي ما قلنا منتج صناعي ، مثلا مثلا ، قطع غيار ، حاجات معدنية أو خشبية ،،،

احنا اتناقشنا كتير ، والاستاذ جمال عيد اتناقش معانا كذا مرة.

وفي الاخر اتفقنا على نشر الفكرة ونشوف الناس اللي عندها افكار مشاريع ومحتاجة لشريك أو شركاء بالمال ، ندرسه ننقاشه ، ولو اتفقنا ، نتوكل على الله.

 

نبدأ إزاي؟

  • ابعت لنا فكرتك بشكل واضح ، ايه المشروع اللي تعرف تعمله أو تتمنى تعمله ، بشرط يكون حاجة انتاجية ، اشرح لنا المشروع ، وهل في مكان أو نبحث عن مكان؟ التكلفة كام بالتقريب؟ وممكن يبدأ امتى ،والتسويق.
  • مش لازم يكون مشروع جديد ، ممكن يكون عندك ورشة أو مصنع صغير ومحتاج لشريك لاعادة تشغيله أو تطويره ، ابعت لنا الفكرة بالتفصيل.
  • يا ريت الايميل لا يزيد عن 500 كلمة ، توضح الفكرة واي حاجة تقنعنا بجديتها وأهميتها.
  • احنا الاربعة ” معانا الاستاذ جمال عيد وهو متطوع بالمساعدة” هنشوف الايميل وهنشوف الافكار اللي توصلنا على الايميل ، وان شاء الله لو فكرة او أفكار عجبتنا ، هنتواصل معاك ونتقابل نتكلم في التفاصيل .
  • طبعا وعشان الصراحة مش هننتظر الايميل وبس ، لكن بنتناقش ونبحث عن افكار قريبة من افكارنا مع ناس اخرين ، لكن هنعلن اللي هنوصل له، سواء وصلتنا فكرة أو افكار من الايميل واقنعتنا ، او من مقابلتنا مع أصدقاء ومعارف تانين.
  • ابعت من النهاردة ، ولو تعرف صديق أو قريب عنده فكرة مشروع قريبة من اللي قريته ، خليه يتواصل معانا.

ونحن نشكركم جدا.

الايميل (awladmisr25@gmail.com)


 

تعليق من جمال عيد:

ناقشت الاصدقاء الاعزاء وعرضهم ، واخبرتهم انني سأكتب تعليق حول الفكرة

 

  • أولا: أنا أعرف الاصدقاء الثلاثة ومتحمس لفكرتهم جدا ، لكني لست طرف فيها.
  • ثانيا : تم الاتفاق أن نقرأ نحن الاربعة الرسائل التي ترد للايميل ، ونناقشها سويا.
  • ثالثا: اذا تم الاستقرار على فكرة أو افكار، وتم نقاش صاحبها أو صاحبتها أو اصحابها ، فسوف يكون دوري المساعدة في انجاز الأوراق ” عقد الشركة + اوراق الضرائب أو التراخيص اللازمة + التسجيل ،، أو ما يتطلبه انجاز المشروع ” متطوعا ، وسوف يتحمل الاصدقاء الرسوم المطلوبة فقط ، ويقتصر دوري على المساعدة بالنقاش والتبرع بالوقت و الجهد دعما للمشروع وتشجيعا لهم.
  • رابعا: سوف ننشر فور الاستقرار على فكرة او افكار والبدء فيها ، دون الاعلان عن الاطراف سواء الاصدقاء أو الشركاء المحتملين.
  • خامسا: الفكرة ليست مطروحة للنقاش سوى عبر الايميل الذي نشرناه ، وهي تتلخص في أن 3شباب معاهم قرشين ، بيبحثوا عن شريك حرفي أو مهندس أو صنايعي أو فنان حرفي ، يكون محتاج لشريك أو ممولين في حدود من مليون إلى 3 مليون جنيه. اكتب فكرتك كلها ، دون استفسارات كثيرة.
  • سادسا وأخيرا : داري على شمعتك تقيد ، واستعينوا على قضاء حواجئكم بالكتمان.

وافر تقديري ،، جمال عيد

 

 

أضف تعليق

التعليقات المنشورة تعبر عن أراء كاتبها, ولا تعبر بالضرورة عن موقف “جمال عيد
POWRED BY WORDPRESS, DEVELOPED BY : ANHRI

Scroll to top